Монголд анх удаа ТЕАТРЧИЛСАН АЯЛЛЫГ зохион байгуулж байна
Бид театрт хайртай ТББ-аас Монголд анх удаа байгалийн задгай орчинд театрчилсан уншлага зохион байгуулах гэж байна. Дундговь аймгийн Өлзийт сумын нутаг дахь үзэсгэлэнт Цагаан суваргын хормойд Пауло Коэльогийн алдарт “Алхимич” зохиолыг сонгодог хөгжмийн хэмнэлд сонсоно. Одтой шөнөөр, түүдэг галын дэргэд, говийн элсэн дээр тухлаад мэргэжлийн жүжигчин сонгодог зохиолыг хэрхэн амилуулахыг шимтэн сонсох боломжтой.
Адал явдал болоод театрт дурлагч таныг аялангаа, урлагийн ертөнцөөр аялах боломжийг энэ амралтын өдрүүдээр буюу наймдугаар сарын 18,19-ний өдрүүдэд олгож байгаа бөгөөд аяллын автобус 18-ны өдрийн өглөөний 10 цагт Улсын драмын эрдмийн театрын урдаас хөдлөх юм байна.
Аяллын явцад зөвхөн театрчилсан уншлагаа сонсоод зогсохгүй үзэсгэлэнт Цагаан суварга дээрээс нар мандахыг харах, байгалийн сайханд органик цай ууж, цай заслын тухайн сонирхолтой яриа өрнүүлж, зөвөлгөө авах, мэргэжлийн тогоочийн хийсэн хоол идэж хүсвэл өөрийн биеэр оролцох боломжтой. Мөн хамтдаа “Алхимич”-ийн ертөнцөөр аялаж буй аялагчидтайгаа танилцан, хүссэн сэдвээр ярилцан цагийг өнгөрүүлж, “Сартай уншлага”-ын өмнөх театрчилсан уншлагуудыг үнэ төлбөргүй үзэх, мэргэжлийн гэрэл зурагчдаар аяллын зургуудаа авахуулж болох юм байна.
Зүүдэнд ирсэн зөндөө итгэж хоньчин хүү нууцлаг эрдэнэсийг хайхаар холын аялалд гарна. Адал явдалд дурлагч та ч бас энэхүү аялалд нэгдэх боломжтой. Дэлгэрэнгүй мэдээллийг Soirée de la Lune / Сартай уншлага фэйсбүүк хаягаар болон, 9411-2757, 89050117 дугаарын утсаар авах боломжтой.
