“Токио-2020” олимп, паралимпийн наадамд нийт 5000 гаруй медаль үйлдвэрлэнэ

“Токио-2020” олимп, паралимпийн наадмын медалийн загварын шалгаруулалтад 400 гаруй бүтээл оролцсоноос дизайнер Жуничи Каванишийн бүтээл шалгарсан.

Тус олимпийн медалийн хэмжээ нь 1.2 см зузаан, 8.5 см диаметртэй бөгөөд нүүрэн талд нь “Афин-1896” анхдугаар олимпийн наадмын цэнгэлдэх хүрээлэн болон Грекийн ялалтын бурхан Никэ, ар талд нь “Токио-2020” олимпийн наадмын эмблемийг дүрсэлсэн байна.

“Токио-2020” олимпийн наадам зохион байгуулах хорооноос олимп, паралимпийн наадмын медалийг хийх зорилгоор 2017 оны дөрөвдүгээр сараас энэ оны гуравдугаар сар хүртэлх хугацаанд иргэдийн дунд хуучин гар утас, цахилгаан хэрэгсэл хандивлах аян өрнүүлсэн билээ. Хандивын аяны хүрээнд 79 мянган тонн төхөөрөмж цугларч, эдгээрээс нийт 32 кг алт, 3.5 тонн мөнгө, 2.2 тонн зэс болон цайр гаргаж авчээ.

Сонирхуулахад, “Токио – 2020” олимп, паралимпийн наадамд нийт 5000 гаруй медаль үйлдвэрлэх аж.